Signed in as:
filler@godaddy.com
About Us
About Temple
പരമഭക്തനായ അർജുനന് പാശുപതാസ്ത്രം (ശിവാസ്ത്രം) നൽകുകയും സന്തുഷ്ടചിത്തനായ ഭക്തരേയും, ലോകത്തേയും അനുഗ്രഹിച്ച് ശ്രീ പാർവതീ സമേതനായി സ്ഥിതി ചെയ്യുന്ന മഹാദേവനാണ് ശരിക്കും പ്രശസ്തമായ പലയ്ക്കാട് ക്ഷേത്രമായ ചുഡുവാലത്തൂർ മഹാദേവ ക്ഷേത്രത്തിലെ പ്രതിഷ്ഠ.
നിളാ നദിയുടെയും അതിനോടടുത്തേയുള്ള പാടശേഖരങ്ങളുടെയും പരിപാവനതയെ പ്രതിഫലിപ്പിക്കുന്ന പ്രശാന്ത സുന്ന്ദരമായ അന്തരീക്ഷത്തിൽ, ചുഡുവാലത്തൂർ മഹാദേവ ക്ഷേത്രം സ്ഥിതിചെയ്യുന്നു.
മഹാദേവനും ശ്രീപാർവതീ ദേവിയും വിശാലമായ വട്ട ശ്രീകോവിലിനുള്ളിൽ പടിഞ്ഞാറും കിഴക്കുമായി ദർശനം നൽകുന്നു.
മൂലബിംബം പ്രതിഷ്ഠിച്ചത് ഖരമഹർഷിയാണെന്ന് ഐതിഹ്യം .
കന്നിമൂലയിൽ ഗണപതി, മഹാദേവന്റെ ഇടത്തു ഭൂതഗണങ്ങൾ, മതിൽക്കെട്ടിനകത്തു കാർത്യായനീദേവി, ഭദ്രകാളി, പടിഞ്ഞാറുഭാഗത്തു കിഴക്കോട്ടു ദർശനമായി മേൽതേവർ, പത്നീസമേതനായ ശാസ്താവ്, നാഗരാജാവ്, നാഗയക്ഷി തുടങ്ങിയ പ്രതിഷ്ഠകളുമാണ് ഈ ക്ഷേത്രത്തിൽ ഉള്ളത്.
ക്ഷേത്രത്തിനു വടക്കു ഭാഗത്ത് വിവാഹ മണ്ഡപവും തീർത്ഥക്കുളവും, തെക്കു ഭാഗത്ത് ഗോശാലയും പൂജാകുളവും സ്ഥിതിചെയ്യുന്നു.
മലബാർ ദേവസ്വം ബോർഡിന്റെ മേൽനോട്ടത്തിലുള്ള ഈ ക്ഷേത്രത്തിൻറെ ഊരായ്മ മൂത്തേടത്തു മന, തെക്കേപ്പാട്ടു മന, പക്ഷി മന, കൂക്കമ്പാറ മന എന്നീ നാല് കുടുംബങ്ങളാണ്.
ഭക്ത ജനങ്ങളുടെ സഹായ സഹകരണത്തോടുകൂടി ക്ഷേത്രത്തിന്റെ ഗോപുരം, അഗ്രശാല, നടപ്പന്തൽ, കൊടിമരം എന്നിവ പുതുക്കി പണിതു.
കുംഭ മാസത്തിൽ ശിവരാത്രി കഴിഞ്ഞു വരുന്ന ഉത്രട്ടാതിക്കു ഉത്സവം, കൊടിയേറി തിരുവാതിരക്കു ആറാട്ടോടുകൂടി സമാപിക്കുന്നു. മീന മാസത്തിലെ രോഹിണിയാണ് പ്രതിഷ്ഠാദിനം.
ശിവരാത്രി ദിവസവും ഉത്സവ ദിവസങ്ങളിലും വിശേഷ പൂജകളും ആഘോഷങ്ങളും നടക്കുന്നു. ശിവരാത്രിനാളിലെ ശയനപ്രദക്ഷിണം പ്രത്യേകതയാണ്.
എല്ലാ പ്രദോഷ ദിവസങ്ങളിലും മഹാദേവന് പ്രത്യേക പ്രദോഷ പൂജ നടത്തപ്പെടുന്നു.
വെളുത്തപക്ഷത്തിലെ പ്രദോഷം ദിവസം ദീപാരാധനയ്ക്കു ശേഷം വൈദികൻ ചെറുമുക്ക് വല്ലഭൻ അക്കിത്തിരിപ്പാടിന്റെ മേൽനോട്ടത്തിൽ വാരമിരിക്കൽ എന്ന വേദോപാസനയും നടത്തി വരുന്നു.
ശിവരാത്രി ഉത്സവ ദിനങ്ങളിൽ ചുഡുവാലത്തൂർ ദേശാഘോഷ കമ്മിറ്റിയുടെ നേതൃത്വത്തിൽ വിവുലമായ ക്ഷേത്ര കലാപരിപാടികളും ആഘോഷങ്ങളും നടത്തിവരുന്നു.
ഗണപതി ഹോമം, മഹാമൃത്യുഞ്ജയ ഹോമം, ഉമാമഹേശ്വര പൂജ, ഉദയാസ്തമന പൂജ, പൂമൂടൽ എന്നിവയാണ് ഈ ക്ഷേത്രത്തിലെ പ്രധാന വഴിപാടുകൾ.
ഷൊർണൂർ റെയിൽവേ സ്റ്റേഷനിൽ നിന്ന് ഒരു കിലോമീറ്റർ ദൂരത്തിൽ ബെപാസ് റോഡിൽ, ചുഡുവാലത്തൂർ ബസ് സ്റ്റോപ്പിൽ നിന്ന് കിഴക്കുമാറി, പ്രശാന്ത സുന്ദരമായ അന്തരീക്ഷത്തിൽ ക്ഷേത്രം സ്ഥിതിചെയ്യുന്നു.
